CONTRA LOS FASCISTAS : RESISTÉNCIA !

19 05 2011

Lo dissabte 14 de mai, cinc militants antifascistas èran arrestats a Bordèu, per « participation à un groupement même temporaire en vue de commettre des violences ou des dégradations ». Dens los hèits, reprochan ad aqueths militants d’aver volut empachar un movement fascista de defilar dens las ruas de la vila per i expausar sas idèas que vienen d’un aute temps. Fau sinhalar que lo movement en question, fondat sus una basa integrista crestiana, s’opausa daubertament au sistèmi democratic, o a las libertats fondamentalas (de pensada, d’opinion, de reunion, de la premsa…) Totun, s’a de constatar que la prefectura, meilèu que prohibit una tala manifestacion, s’estima mei d’arrestar lo monde que s’i opausa.
Aquestas arrestacions son l’exèmple perfècte de l’evolucion politica qu’èm a viver, jos l’efècte de la politica extremista de N. Sarkozy. Las idèas de la dreta nacionalista francesa, lunh d’estar combatudas o denonciadas per nòstes elegits, son defendudas uèi-lo-dia per una granda part de la classa politica au poder. LOPPSI puish LOPPSI 2, repression contra los que s’opausan ad aqueth projècte securitari, luta violénta contra l’immigracion e los tribalhadors shens papèirs, proliferacion d’un ambient racista dens mantun mitans, normalizacion deu Front National dab l’ajuda deus grands mediàs nacionaus, aqueste climat NON DIU PAS ESTAR ACCEPTAT !
Nosautes occitans am de brembar la nòsta pausicion : volem lo dret d’existir en tant qu’occitans, de viver, decidir e tribalhar au pais. Èm occitans pr’amor vivem aqui, de Bordèu dinc a Marselha en passar per Lemòtges o Clarmont d’Auvernha, pr’amor aimam aquera cultura e aquera lenga milenària, pr’amor militam o èm investits dens la vita de nòsta parçan, e pr’amor atau nos sentissem. Aqueste sentiment, aquera occitanitat nos balha drets. Pas pr’amor vedem nòsta cultura o nòsta lenga com superiora a la cultura francesa, a l’espanhòla o a l’algeriana : totas las culturas e las lengas s’equivalen, nada es superiora, nada es inferiora. Mès volem lo nòste dret d’existir sii respectat ; volem la nòsta lenga sii ensenhada seriosament, sii presenta publicament, volem la possibilitat de tribalhar ont volem shens aver de passar per Paris o de quitar nòste territòri per ic har. Volem las institucions politicas per avançar en aquera dralha, e per bastir una societat egalitària e respectuosa de l’uman en çò nòste. Per aquò lutam.
Mès n’acceptam pas la recuperacion de la nòsta identitat per servir causas mausanisas e reaccionàrias. Occitània s’es bastida, dempuish segles, en mesclanhar los pòbles, las lengas. Èm una tèrra d’arculh, dempuish las colonias arabas de l’Edat Mijana dinc aus republicans espanhòus de 1936, shens desbrembar los exiliats de tota traca que s’installan sus nòstas tèrras e conviven shens dòu dab las poblacions autoctònas.
Pr’amor d’aquò nos opausam dab fòrça ad aquera fascizacion de la societat que ne podem pas que constatar uèi-lo-dia. Los drets ganhats dempuish detzenas d’annadas (libertats d’opinions, de cauma, acquesits deu dret deu tribalh, legalizacion de la contracepcion e de l’IVG, leis contre lo racisme) an d’estar defenduts fàcia aus moviments reaccionaris que’us miaçan.

A BORDÈU, EN OCCITANIA
COM PERTOT ALHORS
NAT FASCISTA EN NÒSTA VITA

Advertisements

Accions

Information




%d bloggers like this: