Pas d’OGM, pas d’ADN !

15 11 2010

Una victòria ven d’esser marcada per la luta anti-OGM en Dordonha. De fach, René Carrier, ancian agricultor, passava davant lo tribunal de Brageirac aquel 9 de novembre, per aver refusat de se josmetre a un prelevament ADN. O sabem, aquela practica, prevista a la debuta pels crimis sexuals, s’es dobèrta a una tièra longassa d’autres crimis mai delictes, a l’excepcion notabla, mas pas sens valor, de la criminalitat financièra…

Alaidonc, lo tribunau volguèt pas condemnar René Carrier per aquel refús de presentacion al test ADN, en dire que de tot biais la lei prevei pas lo prelevament per la destruccion volontària del ben de qualqu’un mai. Se seriam faches enganar ?

Per tornar suls faches reprochats, se cal brembar de novembre 2006, quora 150 dalhaires volontaris avián menat una operacion de traçabilitat del milh transgenic en Gironda, en ajustar d’aiga colorada a un silò. René Carrier ne fasiá partida, e sos companhs lo consideran coma un « ciutadan lançaire d’alèrta », mai que coma un terrorista, çò qu’auriam tendéncia a créser en legir los jornals.

Tornarem pas aquí suls OGM, que, o sabem plan, fan jà la casi-unanimitat contra eles. Sonque, en seguir los dalhaires volontaris, direm qu’es anormal d’esser considerat coma un violaire potencial alara que la sola causa qu’òm a facha partissiá d’una demarcha militanta e ciutadana.

A malgrat d’aquò, René Carrier foguèt convocat davant lo procuraire de la Respublica, per « comparucion sus reconeissença prealabla de culpabilitat ». Totes a la Justícia ensajèron de li far plaidejar coma copable, non pas per son accion anti-OGM, mas plan per aver refusat son inscripcion al fiquièr genetic. Aquò li auriá degut (sonque) un mes de preson. Mas René Carrier tenguèt bon, e desclarèt pas se sentir copable de refusar un fiquatge pels delinquents sexuals. Aquela mena de coratge auria pògut, çaquela, li dèure un an de preson e 15000 euròs de multa (mai una novèla demanda d’injonccion, e aquò pòt durar de temps). Alara que, la decision del tribual o mòstra, èra dins son bon dret !

Aquela parodia de justícia, lèu-facha, a las termièras del Dret, vòl empachar los militants anti-OGM de dobrir la boca e de far valer lors drets, tant coma d’empachar la tenguda d’un vertadièr desbat sul fiquatge. Las riscas son tròp gròssas : tot lo monde se calan. Çò piéger per nosautres es qu’aquèla paur de la sanccion de l’acte militant venguèsse una lei e passèsse per una aprobacion publica.

Al tribunal, René Carrier comparèt la situacion actuala de fiquatge a aquèla de l’atge mejan, quora l’Inquisicion marcava d’un fèrre o d’una estèla jauna los catars e los josius…

Òm se dèu pas enganar : aquèla liberacion es una victòria, plan segur, mas pichòta, en véser tot çò qu’implican aquelas insurtas a las libertats individualas. E aquí parlam pas sonque del fiquatge, mas tanben de totas las leis qu’an precedit l’introduccion de las culturas OGM e que tòcan ara lo monde agricòla : interdiccion de s’escambiar los semens, interdiccion de maselar a l’ostal, numerotacion del bestial… en brèu, tot çò que condamna a mai o mens long tèrme una agricultura plurala e respectuosa de totes.

La batèsta s’estanca pas a aquèla decision de tribunal, e ara, coma René Carrier e sos companhs, a Libertat demandam a que sian esfaçats dels fiquièrs las donadas personalas suls dalhaires : un militant es pas un delinquent !

 

Advertisements

Accions

Information




%d bloggers like this: